Er du nyfiken og glad i å snakka med folk? Me søkjer journalist

Hordaland

Hordaland er lokalavis for Voss, Granvin, Ulvik, Vaksdal, Modalen, Eidfjord og Ullensvang. Lokalavisa har lokale eigarar og samarbeider med Amedia om alt av tenester og system. Hordaland er opplagsvinnar blant lokalavisene i Vestland med eit opplag på 8527. Me veks kraftig digitalt, samstundes som at papiravisa står sterkt. Avisa kjem ut tre gonger i veka.

Lokalavisa på Voss er i vekst og no aukar me den faste staben. Me har høge ambisjonar for innhaldet vårt, vil du bli den nye kollegaen vår?

I Hordaland har me ledig ei fast stilling som journalist i vaktsjefturnus, samt eit vikariat på fulltid som journalist ut april 2023.

I ei avis som Hordaland betyr journalisten noko ekstra for lokalsamfunnet. Du skaper innhald som folk snakkar om, fordi du kjem tett på, med kort veg til kjelder og saker. Som vaktsjef er du arbeidsleiar og har ansvar for å prioritera saker og rettleia kollegaer. Du har òg ansvar for innhaldet vårt i sosiale medium.

I Hordaland vil du få utfordra deg på journalistikk i alle sjangrar til ulike plattformer, og moglegheitene til å utvikla seg som journalist og vaktsjef er eineståande gode. Her kan ideane dine bløma, og det er rom for å utforska og laga innhald på nye måtar. Me samarbeider med Amedia, publiserer på deira tekniske løysingar, og har tilgang på deira redaksjonelle kompetansemiljø.

Kvalifikasjonar:

• Er utdanna journalist eller har annan relevant utdanning
• Likar å driva med idéutvikling og forstår kva som er ei god sak
• Er trygg i språk og verdset god språkbruk

Personlege eigenskapar:

• Sterk motivasjon for å gje lesarane det beste innhaldet
• Evne til å utvikla og formidla innhald som treffer nye målgrupper
• Brenn for journalistikk som opplyser, utviklar og underheld samfunnet
• Trivst i eit arbeidsmiljø med høgt tempo og raske val
• Har lyst til å utvikla deg sjølv og andre til det beste for avisa

Ei avis for mange

Hordaland held til i sentrum av Voss, ei av dei mest innovative bygdene i Noreg. Med jernbanen kjem du deg til både Bergen og Oslo, og turmoglegheitene i og kring bygda er heilt unike. Mange kjenner til Voss gjennom Ekstremsportveko, Voss cup, skisport eller Vossa jazz, men Voss har òg ei sterk lokalavis med mange lojale lesarar. Med Voss herad sine 16.000 innbyggjarar vil du som tilsett i Hordaland vera viktig for mange. I tillegg kjem omeignskommunane Ulvik, Vaksdal, Modalen, Eidfjord og Ullensvang, som avisa òg dekkjer.

Me treng deg!

Hordaland er ei nytenkjande avis med tradisjonelle røter, med store ambisjonar for framtida. Me skal vera ein attraktiv arbeidsstad, driva eit moderne mediehus, laga

kvalitetsjournalistikk, vera fyrstevalet til kundar og ha ei synleg merkevare. Målet er å verta endå viktigare for dei som brukar oss. Redaksjonen tel per i dag 13 personar, og me har mål om å bli fleire.

Vil du vera med å fornya ei av landets beste lokalaviser? Då søkjer du jobb som journalist hjå oss!

Informasjon om stillingane:

Stillingstype: Fast og vikariat
Arbeidsstad: Voss
Søknadsfrist: 20. september

Kontaktinformasjon:

Ingvil Aaen Torpe, ansvarleg redaktør,
tlf. 957 39 673 / iat@avisa-hordaland.no

Ørjan Brattetveit, klubbleiar,
tlf. 416 23 262 / obr@avisa-hordaland.no

Send søknad og CV til iat@avisa-hordaland.no

Søk stillingen her