Draumejobben er ledig (igjen)!

Hordaland Folkeblad treng ein bladfyk i 100 prosent stilling frå sommaren 2021.

Me tek gjerne imot ein søknad frå deg som

• skriv konsis og korrekt nynorsk, har syn for detaljane i språket og likar å trøya deg med pennen
• har røynsle med fotografering, filming og avisarbeid, pluss eit årvake blikk for gode saker
• forstår at sosiale medium er eit nyttig vonde som du kan utnytta
• tenkjer digitalt utan å vera klikkprostituert
• har førarkort for Lexus UX 300e (!)
• les kommunedelplanar og brev frå statsforvaltarar for å få fart på sexlivet
• er fleksibel, sjølvstendig, snåp, ryddig og omgjengeleg, og evnar å knyta passeleg tette band til gode kjelder
• ser avgrunnen mellom marknadsføring og journalistikk, og lever greitt med å få skjenn frå dei som ikkje ser han
• har som rettesnor at ikkje alt som sel godt, er god journalistikk
• kan handtera både stort ansvar og stor tillit
• er villig til å yta meir enn du må og ikkje ser på inneklemte dagar som fridagar
• ikkje ser på jobben som eit springbrett eller ei retrettstilling
• lever greitt med ei løn som aldri gjer deg til ein del av snobben
• finn deg til rette i ein liten, men relativt triveleg kollegafellesskap i små, men relativt trivelege kontorlokale som etter ti år framleis manglar dekor på veggene
• er frekk nok til å søkja sjølv om du ikkje stettar nokon av krava – og trur at du kan få jobben sidan du har resonnert deg fram til at knapt nokon fantaserer om ein kvardag i ei tasal lokalavis

Send søknad til redaktør Sigbjørn Linga: linga@hf.no. Ring 415 66 112
om du lurar på noko.

Søk på stillingen her